Najeriya ta tabbatar da bullar Coronavirus a Lagos

Hukumomi a Najeriya sun tabbatar da bullar cutar coronavirus da ake kira Covid-19 a jahar Lagos.

Ma’aikatar lafiya ce ta tabbatar da bullar cutar a sanarwar da ta wallafa a shafinTwitter, inda ta bayyana a matsayin  karon farko da aka samu bullar cutar a Najeriya tun barkewarta a China a watan Janairun 2020.

 

Haka ma cibiyar da ke yaki da cututuka masu yaduwa a Najeriya ta wallafa a shafinta na Twitter  cewa, ministan lafiya ya tabbatar da bullar cutar a jahar Lagos.

A sanarwar da ya fitar, ministan lafiya na Najeriya Dr Osagie Ehanire ya ce wani dan Italiya ne da ke aiki a kasar ya shigo da cutar bayan ya dawo daga Milan zuwa Lagos.

“Sakamakon gwaji da aka gudanar a asibitin koyarwa na jami’ar Lagos ya tabbatar da yana dauke da cutar.”

“Ana duba lafiyarsa a asibitin kula da cutuka masu yaduwa a Yaba, kuma marar lafiyar bai nuna alamomi masu muni ba,” in ji shi.

Ya kuma ce gwamnati ta kara tsaurara matakai domin tabbatar da dakile yaduwar cutar.

Tun a ranar Laraba ne ake ta yada jita-jitar labarin bullar cutar a Lagos a shafukan intanet bayan kwantar da wani dan China a asibitin Reddington da ke Ikeja.

BBC ta rawaito cewa, daga baya asibitin ya karyata labarin amma bai musanta zuwan dan China ba a asibitin domin diba lafiyarsa da ake fargabar yana dauke da cutar mai yin kisa a China.

Hukumar lafiya ta duniya WHO ta ce cutar coronavirus ta kai wani matsayi na zama annoba a duniya saboda yadda take yaduwa.

Najeriya yanzu ta shiga jerin kasashen duniya da aka samu bullar cutar ta da ake kira COVID-19, kasa ta uku da aka samu bullarta a Afirka bayan Masar da Aljeriya

Leave A Reply

Your email address will not be published.

This website uses cookies to improve your experience. We'll assume you're ok with this, but you can opt-out if you wish. Accept Read More